لايكلبي لاتعاتب ,,, للشاعر المرحوم جبار شدود

لايكلبي لاتعاتب
لايكلبي لايخايب
اطوي صفحات العتب يالجايب الروحي الطلايب
انه يامه ويامه كتلك
لاتامن عشرة البذات والماعنده صاحب
وانا جم مرة نهيتك
لاترافك ذيب عالسجه وكمر دنياك غايب
وانه جم مرة نصحتك
لاتطر وحدك جزيرة وتسحك بجدمك زواغير العكارب
لشوكت تشتل موده ومنجلك يحصد مصايب
وهاي الك جم عثره تعثر وشكثر نابتك يمكدر نوايب
وانته ذاك انته اعله حالك مرافك الصياد والجيله بغزالك
صارن سنينك رماد وهفت موكد نارك وبردن دلالك
ولسه بعدك تبجي عالمايوم هلن عيونه وبجالك
تلهج بطاري الشلاك وكلب البطاريك يلهج ماخطر يوم اعله بالك
تبيع بالكلب الشراك وتشري كلب الباعك وعاشر بدالك
لاتذب الصوج واللوم اعله وكتك ايدك الخبطت زلالك
مسودن وراسك عنيد يلاجي شرجيك شمالك
وحيرتني وياك كل ساعه اعله راي لانه عارف طبعك ولاتنحزر
فيضك يساجي الحماده وعايف الكاع البجر
الناس غركانه ابفرحهه وتضوي الصواني بشمعهه
وانته بس انته فرحتك كفره وبليله كدر
امحلت دنياك وانته تريد من تموز مزنه اتريح اسنين العمر
لاتظن وكت التعده يرد مثل ماجان وينفعك صبر
ولاتظن يطوي عباته الليل ويطر الفجر
لايكلبي دنيتك موش اعله الاول كحلت عين الهليجي وفكست اعيون الصكر
وبعد لاتعتب يكلبي هذا تالي الصافحتهم
واشتلت ورده اعله جفهم
شتلو بجفك جمر