احن و اشتاكلك الشاعر سيف الحلفي

احن واشتاكلك رغم المراره البـــــيك
مثل شوك الزغار لنص شهر رمضان
وما صبلك دمع نشفت لهاة الــــــعين
بجيت الدم عليك ويبس الشريـــــــان
احن واشتاكلك حنيه السيـــــــــــــاب
لجيكور القديمه ومـــــنزل الأقـــــنان
ومن اشتم صورتك بأنفاسي يطلع شيب
لذلك من ادخن ابيــــــــــــــض الدخان
واحس فزاعه جرحي والدوه بجف طير
واليكتلك شماته مكابله البـــــــــــستان
مثل جويات ناكه بكلبي الك جـــــويـات
بقن نيشان منك ليــــــله النـــــــــيشان
مماتي وزفتك حدثن بنفـــــــــس اليوم
ومن بدلة زفافك فــــصلولي اجفــــــان
ترى انه معزبه كصتي وجفي خمس ضيوف
ياهو الفهمك عالفركه ماندمـــــــــــــان
بس الدنيا منجل والعمر محــــــــصول
واحس رغباتي بير.. ويوسف الحرمان
واسافر بــــــس تصاويرك ألمها متاع
وأسد جوع العيـــــون بصورتك يفلان
تهت بعدك وأدور شجره للأيــــــــجار
اكابر من طرت لا تــــــشمت الغربان
طير اليــــحترك عشه وتشوفه يطيـــر
يلطم عالصـــدر من يصفك الجنحـــان
دخيط سنيــــــن عمري بجيتك يهواي
وكحل ذكرياتي بمـــــــــرود النسيان
وألون صوتي وردي بيوم الأحجي وياك
وأشرب ارتباكي بكأس الأطمئــــــنان
ياعرج السواحـــل موسهل ملـــــــكاك
ياطير الكطا الما يركــــد بعنـــــــــوان
تذب سناره أذني تصيد حجي النـــاس
وتدور سيرتك لو صادتلها لســــــــان
ياذلـــــه هواي وفشله الرســـــــــــام
من يعرض لوحته بمعرض العميـــان
وما باريك ذمه شلون افكلك ديــــــــن
وشفت دم الشراع بخنجر السفـــــــان
كتلت العنكبوت وانه جوه الغــــــــــار
وطيرت الحمامه بجية ابا سفيـــــــان
وحشاك من الغلط ياخلي بيه الصوج
ضيعني الخجل لو ادري ما خجــــلان
وتاكدت الحياء يغرك السبــــــــــــاح
اذا ما ترفع ايدك عــالنهر غلــــــطان
لأن ابيض كلب يتكسر الطبشـــــــور
فليحياالسواد وتسقط الألـــــــــــوان
وما اصدك تجيني تعوض الي راح
يانهر الي يدفع ديه للغركــــــــــــان
اصفن من اذكرك صفنه الأمـــــوات
وتضحك فوك جثتي بضحكه الدـفان
وغيبه المكبره...والموته هم شمات
اذا طبت جنازه مفاركه الخــــــــلان
واسمع موته يمي تنادسوا يحجون
ميت ماله احد ماورا صحبـــــــــان
د مر بيه على بختك سكت الميتين
احس حتى التراب البلكبر شمتان
هسه انه بحياتي بحبك انذليـــــت
عادك بالكبر ما اريد اضل خجلان