بلياك ماعيش

بليلك ماعيش اليكلك عشت
بعيوني احلفك منه تاخذ حذر
اني اطمأن يمك واذا تبتعد
من كلشي يمي انا احس بخطر
الليل يدري شكد احبك لان
وياك عيني تستلذ بسهر
اذبل لحد ماارتوي بشوفتك
جن سنبلة الروح وعشرتك مطر
بلياك كلشي يصير مابيه طعم
ماميز بين الورد والصخر
تمطر ترافة وانا اخضر غزل
وبكاع جفي قلمي يطرح ثمر
علمت روحي من صغر شوفتك
ردتك صدك تبقى نقش عالحجر
تشتاكلك روحي اذا سافرت
مثل النوارس من تحن للبحر
انا شسوي بنظر لورحت
من تمشي كلي حتى اضمه النظر
مادور بحبك خسارة وربح
ماافكر بكلبي خسر لوربح
كل اليهمني انا احبك فقط
حب لونه صافي وابيض من الكمر
طير انته من مر بسمه دنيتي
وكر على روحي وعليها استقر
يسكت غصن خلكي قبل لاتمر
ينتظرك الريح التحرك الشجر
بلياك كلبي يصير مابيه نفع
شيفيد كلي الغيم الي بلامطر
عين الاشوفك بيها احس تختلف
مو مثل عيني البيها اشوف البشر
مرات احجي صورتك عالورق
من اخلط احساسي وي لون الصور
اامشي بحياتي وامعن بخطوتك
حتى من اتيهك عالاقل الكه اثر
انا من اعوفكط جدمي يمشي بثكل
ثكل الجدام الماله من السفر
ومن تمشي عني الكون احس يختنك
والعالم بكبره احس بيه صغر
بس لمن تردلي ارد اكتشف
كلشي بمكانه وانته حبك كبر


تحياتي