&&بدى العام الدراسي وبدت الهموووم&&

بدى العام الدراسي وبدت الهموم

وبيتي عالمدارس بابه صاير

نسيت ...وداعتك جيت اشتري هدوم

إلك ...ومحضر اقلام ودفاتر

مو تسمع قيام ...وليش ماتكَوم؟

ومر اسمك ولا من كَال ...حاضر

الشمس طلعت علينا...مو وكت نوم

وهم عدكم صبح يا اهل المكَابر

وهم عدكم ...ضوه ...وشباچ ...ونجوم

وهم ينطونكم واجب لباچر ؟

الوالد بالوداع يصير مهموم ..

.وانا اثنينهن والد وشاعر

دخيلك طشرتني وچنت ملموم ...

وصارت طيحتي بين الحوافر

اذا عشرين يوم وما شفت نوم..

.شيظل بالحيل بالعشره الاواخر ؟

فراش الفاتحه لو شفته ملموم ..

.بنص كَلوبنا تلكَه الچوادر

يمنه المصبغه ..ودينه لهدوم

لحزنك مشترينه قماش حاضر

تمنيتك جرح ...كلساع ملچوم

وتبات الليل بشفاف الخناجر

انا يا بوي من ونيت مالوم ..

.نزل مني دمع يعمي النواظر

خدودي تعودت تتندى كل يوم ..

.وتحب الماي خشبات الكَناطر

لمت الروح بس شفادني اللوم.؟؟

..شلحك ؟ وبسفينة الموت عابر؟؟

المنايا عالسطح وعيونها تحوم...

عليك ...ونزلٌتلك نسر كاسر

ستر الله نغگ بديارنا البوم...

اخذ عين الكَلاده وراح طاير

دًيٌني حلاتك حلو الرسوم..

.بلكي انعشگ ، دنيانه مظاهر

أظل كاظم وصبري وياي مكظوم...

لوما هالخشب جوه الاظافر

إهن كاسين بيهن كاس مسموم...

خاف أغلط وبالمسموم اكاسر

بعنه البيت ، ريت البيت مهجوم....

وريت اكثر بعد من هالخساير

تحب انت اللعب والگبر ملموم ...

شلون تحملت وشلون صابر؟

وليش من الهوى يابوي محروم ...؟؟

ونسمات الهوى تطيب الخاطر

منهو ؟ الشوفك صورة المعدوم...؟؟

وليش تعلكَت ياشاب يا قاصر

ما ظنيت زرعي يروح فد يوم ...

وعصافير الحزن تگضي البيادر

من اكتب قصيده تزيد الغيوم...

ومن عيني الدمع يملي الدفاتر

يبقى بهل مطر ياشعر منظوم...

نصاري الحسين وبحر وافر
...........................
الشاعر كاظم إسماعيل الكَاطع...

تحياتي..